Беларуская Грэка-Каталіцкая супольнасьць

Першае, што кідаецца ў вочы наведвальнікаў царквы Сьвятога Сэрца – гэта іканастас, што віднеецца за галоўным алтаром. Ён ёсьць важнай часткай Бізантыйскай літургіі, якая штотыдня адпраўляецца ў нашай царкве Беларускай супольнасьцю.

Што асаблівага ў Беларускай Грэка-Каталіцкай Царквы?

• багаслужбовымі мовамі ёсьць беларуская, царкоўна-славянская, і тут, у Бэльгіі, таксама нідэрланская (фламандская).
• Літургія – Бізантыйская, якая ў прастамоўі часта называецца "праваслаўнай", а афіцыйна "Боскай Літургіяй" сьвятога Яна Залатавуснага (або сьв. Васіля Вялікага, або Раней Асьвячаных Дароў” – залежна ад літургічнага календара)
• Багаслужбовы каляндар – новаюліянскі (адзначэньне так званых двунадзесятых (гэта значыць 12-ці галоўных) сьвятаў і іншых, што трымаюцца цьвёрдых дат, напрыклад, Нараджэньне Хрыстовае, дзень сьв. Мікалая, Дабравешчаньне і іншыя, супадае з грыгарыянскім календаром, а Вялікдзень і залежныя ад яго сьвяты (напрыклад Ушэсьце і Сёмуха) – сьвяткуюцца паводле Александрыйскай (праваслаўнай) Пасхаліі)
• Гэтая Царква, у адрозьненьні ад аддзеленых Праваслаўных Цэркваў, перабывае ў еўхарыстычнай еднасьці з усёй Каталіцкай Царквой і знаходзіцца ў герархічным падпарадкаваньні пераемніку вярхоўнага Апостала Пятра - Папе Рымскаму.

Беларуская Боская Літургія адпраўляецца ў царкве Сьвятога Сэрца кожную нядзелю а 12-й гадзіне. То бок адразу пасьля Інтэрнацыянальнай шматмоўнай Імшы, што адпраўляецца паводле заходняга Лацінскага абраду (Рымскага Імшалу).